आम्ही आपली साधी सरळ माणसं

             विठूचा गजर करणारी, मुखी हरीनाम जपणारी, कीर्तन – अभंगात रमणारी, विठूच्या नामात रंगणारी, ज्ञानोबाला मानणारी, तुकोबाला जाणणारी, माणसांत देव पाहणारी, टाळकरी, विणाकरी.... अशी भक्तीच्या प्रवाहांत चालणारी वारकरी, आणि उभ्या आयुष्यांत कधीही मटण-मांस, मच्छी  न खाता परंपरा जपणारी माळकरी,

            आणि दारी तुळस असणारी, अशी आपली साधी सरळ माणसं...

            सोमवारी महादेवाला, शंकराला बेल वाहणारी, मंगळवारी देवीला जाणारी, गुरुवारी स्वामींना, दत्तगुरुंना, बाबांना, नाथांना श्रद्धेने फुलं वाहणारी, शनिवारी शनीला, मारुतीवर तेल चढवणारी, तर रविवारी खंडोबा, ज्योतीबांला पुजनारी, चतुर्थीला खास बुद्धीची देवता आणि कलांच्या अधिपती अशा गणपतीसाठी म्हणजेच बाप्पासाठी एक दिवस का होईना पण उपास करणारी, आणि तिथं बाप्पाशी मात्र एक वेगळ हक्काचं मैत्रीचं नातं असलेली, शक्तीची उपासक म्हणून नवरात्री नऊ दिवस देवीचा जागर करणारी, एकादशी पाळणारी, पौर्णिमा पाहणारी, आणि अमावास्या मानणारी....

            अशी आम्ही आपली साधी सरळ माणसं....

            शिवाजी महाराजांवर निष्ठा असणारी, गड-किल्ले सर करणारी, तत्व जपणारी, शब्दांला जागणारी, माणसांवर डोळे झाकून विश्वास ठेवणारी, धूर्तपणा आणि राजकारणीपणा पासून तशी दूरच असलेली

            अशी आपली साधी सरळ माणसं.....     

- कृष्णा खैरे